Дар оғоз М. Саломиён – муовини якуми вазири маориф ва илм зикр кард, ки рақамикунонии низоми идоракунии маориф ва таҳияи Консепсияи таҳсилоти рақамӣ дар Ҷумҳурии Тоҷикистон яке аз самтҳои муҳими ислоҳоти соҳаи маориф ба ҳисоб меравад. Таҷрибаи байналмилалӣ нишон медиҳад, ки рушди  низоми иттилоотии идоракунии соҳаи маориф самаранокии фаъолияти сохторҳои гуногунро афзун намуда, имконият медиҳад, ки иттилоот ҳамчун воситаи муҳими идоракунӣ истифода шавад. Гузашта аз ин, низоми иттилоотии идоракунии соҳаи маориф барои таъмин намудани сохторҳои гуногуни давлатию ҷамъиятӣ ва аҳолӣ бо иттилоот нақши муассир мегузорад.

Сипас, Абдураҳмон Гулзода - сардори шуъбаи низоми ахборотии идоракунии Вазорати маориф ва илм дар мавзуи “Рақамикунонии системаи иттилоотии идоракунии маориф (emis): мушкилот ва пешомадҳо” баромад намуда, таъкид дошт, ки мақсади асосии ба вуҷуд овардани Системаи иттилоотии идоракунии маориф (СИИМ) ин муттаҳид гардонидани ҷараёни ҷамъоварӣ, коркард ва муҳофизати иттилоот оид ба таълиму тарбия ва фаъолияти муассисаҳои таълимӣ ва таъмин кардани Вазорати маориф ва илм, инчунин мақомоту сохторҳои давлатию ҷамъиятӣ бо иттилоот мебошад. 

Ҳамзамон, Шавкат Каримзода - директории Маркази иттилоотию таҳлилии назди Сарраёсати маорифи шаҳри Душанбе дар мавзуи “Татбиқи барномаи электронии “eDonish” дар муассисаҳои таҳсилоти умумии шаҳри Душанбе бо истифода аз технологияҳои иттилоотию коммуникатсионӣ”, Неъматуллоев Муродбек - директори Гимназияи №1 барои хонандагони болаёқати шаҳри Душанбе дар мавзуи “Тақвияти ҳамкориии муассисаҳои таълимӣ бо падару модарон тавассути барномаи электронии “eDonish” ва Ҷилдиз Доолбекова - ҳамоҳангсози барномаҳои ташкилоти Таалим-Форум (онлайн) дар мавзуи “Омўзиш бо истифодаи технологияҳои фосилавӣ барои баланд бардоштани сифат ва дастрасӣ ба таҳсилот дар Ҷумҳурии Қирғизистон” маърӯза намуда, ҷиҳати ҷоннок гардондани корҳо дар ин самт, фикру мулоҳизаҳои худро иброз доштанд.